كيف يفكر الرجل فى المرأة ؟ سؤال - بالتأكيد - تريد كل امرأة معرفة إجابته. سأقدم هنا باختصار خريطة دماغ الرجل.. وأريد من كل بنوتة شطورة الإنتباه.. علشان تتجنب أن تضع نفسها فى موقف لا تتمناه أبدا.
أولا .. الراجل مننا مركز مع الحريم 24 ساعة فى ال 24 ساعة ..حتى المتزوج..بيركز مع كل الحريم ما عدا المدام طبعا. وتركيز الرجل ده غريزى ..طبيعى ..دائم.. يعنى متحوليش و لا حتى تفكرى إنك تمنعى الحكاية دى.. لأنه طول ما هو عايش وفى نظر هيفضل يركز مع الحريم.
لكن المهم فى هذا الموضوع.. إن الرجل فى تعامله مع النساء عموما فى حياته لديه قائمتين : الأولى قائمة الزوجات والثانية قائمة العشيقات.. والرجل عموما من أول لحظة بيحط عينه فيها عليكى بيضعك فى واحدة من القائمتين .. ويقول لنفسه " هذه أتزوجها " أو " هذه أعط معها - أو أصاحبها..الخ ". وطبعا البنت الشطورة هى من تعرف كيف تجعل الرجل يضعها فى القائمة الأولى.. لأنه لو وضعك فى الثانية..فلن تخرجى منها أبدا ولو بالطبل البلدى.
والرجل بيعتمد فى تصنيفه للحريم على مجموعة لا متناهية من الإشارات والعلامات التى تعطيه انطباع من اثنين..الأول " هذه امرأة شريفة تصلح للزواج" و الثانى " هذه امرأة لعوب أو مش شريفة قوى..أو مشكوك فيها .. ولا تصلح للزواج ".. ولكن لأن النساء نعمة ربنا .. فمينفعش نرميهم كده حتى لو مش هنتجوزهم .. فالراجل من دول يقول يمكن الاستفادة منها بطرق أخرى غير الزواج..أنتم فاهمين طبعا.
طيب أنتِ تعملى إيه علشان الراجل يضعك فى القائمة الأولى ولا يفكر فيكى إلا كزوجة فقط ومش أى حاجة تانية.. بسيطة.. الراجل عامل زى الريسيفر بيتقبل اشارات.. وكل ما عليكى أن ترسلى له إشارات تدل على جديتك و أخلاقك.. يعنى فى اللبس مثلا.. مينفعش تمسكى العصا من النص.. يعنى شوية حشمة وحجاب على شوية محزق وملزق.. لأنه فى هذه الحالة الرجل هيميل تلقائيا - بحكم تركيبته - الى اعتبارك امرأة منحلة تحاول أن تتنكر لتخفى انحلالها وطبعا سيضعك فى القائمة الثانية..يعنى لازم تكونى واضحة فى تصرفاتك ولبسك وتعطيه فكرة لا لبس فيها بأنك شريفة عفيفة طاهرة وملكيش فى أى كلام كده أو كده.
و أخيرا لو بتسألى نفسك..إيه الفرق بين المرأة التى فى القائمة الأولى والتى فى القائمة الثانية - غير مسألة الزواج طبعا ؟
أنا أقولك.. الفرق أن المرأة فى القائمة الأولى بالنسبة للرجل ( يشتهيها - يحبها - يحترمها)..أما التى فى القائمة الثانية ( يشتهيها فقط ).
